客家童谣 《月光光》(6)

江西赣县客家《月光光》：

邱冠英收集整理：

月光光，照南塘；南塘水，界平江；

平江流，到贡江；贡江水，连赣江；

赣江头，进鄱阳。鄱阳满，出长江；

长江坦荡荡，浩浩入东洋。

冲掉龙王殿，冲掉东洋床。

淹死东洋鬼，浸死日本狼。

呵呵呵呵，哈哈哈哈！

发梦好做田，禾谷堆满仓。

一颗谷，一颗谷，公鸡声声咯，

一颗沙，一颗沙，母鸡笑哈哈。

江西上犹客家《月光光》四首：

（一）

月光光，光索索。

捱跌苦来你快乐。吃又冇好吃，着又冇好着。

年年拼命做，总是住个烂屋壳。

再多学堂捱冇分，走出世来当狗粪。

再娇妻子冇钱讨，害得穷人样得老。

（二）

月光光，秀才郎；

骑白马，过莲塘；

莲塘背，种韭菜；

韭菜花，结亲家。

亲家门口一口塘，蓄个鲤蟆八尺长；

鲤蟆背上承灯盏，鲤蟆肚里做学堂；

做个学堂四四方，掌牛赖子读文章；

读得文章马又走，一走走到伯公坳。

伯公坳上讨姑娘，讨个姑娘矮笃笃；

煮个饭子香勃勃，讨个姑娘高天天， 煮个饭子臭火烟。

（三）

月光光，照河上。

河来等，轿来扛。

扛嘛咯，扛花鞋。

扛到几多双，扛到十八双，

奈双好？双双好！

留到明年取太嫂，

太嫂歪，寻奶奶。

奶奶嗯得唅（闲），

告到紫阳太路坪。

（四）

月光光，照和尚，

和尚懒得去守庙，改行卖草帽，

草帽冇人贪，改行去挖岭，

挖岭又嫌苦，改行撵猪牯，

猪牯会踢人，改行学挪绳，

挪绳软咪咪，改行去撑排，

撑排跌下河，改行学补箩，

补箩手出血，改行去打铁，

打铁墨墨乌，改行学杀猪，

杀猪唔干净，改行学算命，

算命又算错，改行去推磨，

推磨又冇力，改行做油漆，

油漆腥死人，改行做裁缝，

裁缝针线差，改行推土车，

推土难上路，改行做豆腐，

豆腐硬笃笃，改行卖杂货，

卖货亏大本，改行卖薯粉，

薯粉结成板，改行去做伞，

做伞手艺粗，改行去教书，

教书冇兴趣，改行学唱戏，

唱戏唱唔来，改行做棺材，

棺材埋哪个，埋了你爷埋你奶，

最后埋你小妖怪。